Psalms 45

Wimbo Wa Arusi Ya Kifalme

(Kwa Mwimbishaji: Utenzi Wa Wana Wa Kora)

1 Moyo wangu umesisimuliwa na jambo jema
ninapomsimulia mfalme mabeti yangu;
ulimi wangu ni kalamu ya mwandishi stadi.

2 ^aWewe ni bora kuliko watu wengine wote
na midomo yako imepakwa neema,
kwa kuwa Mungu amekubariki milele.

3 ^bJifunge upanga wako pajani mwako, ee mwenye nguvu,
jivike fahari na utukufu.

4 ^cKatika fahari yako, songa mbele kwa ushindi,
kwa ajili ya kweli, unyenyekevu na haki,
mkono wako wa kuume na uonyeshe matendo ya kutisha.

5 ^dMishale yako mikali na ichome mioyo ya adui za mfalme,
mataifa na yaanguke chini ya nyayo zako.

6 ^eEe Mungu, kiti chako cha enzi
kitadumu milele na milele,
fimbo ya utawala wa haki
itakuwa fimbo ya utawala wa ufalme wako.

7 ^fUnaipenda haki na kuchukia uovu;
kwa hiyo Mungu, Mungu wako,
amekuweka juu ya wenzako,
kwa kukupaka mafuta ya furaha.

8 ^gMavazi yako yote yana harufu nzuri
ya manemane, udi na mdalasini;
kutoka kwenye majumba ya kifalme
yaliyopambwa kwa pembe za ndovu,
sauti za vinanda vya nyuzi
zinakufanya ufurahi.

9 ^hBinti za wafalme ni miongoni mwa wanawake wako waheshimiwa;
kuume kwako yupo bibi arusi malkia aliyevaa dhahabu ya Ofiri.

10 ⁱSikiliza, ewe binti, fikiri na utege sikio:
Sahau watu wako na nyumba ya baba yako.

11 ^jMfalme ameshangazwa na uzuri wako;
mheshimu, kwa kuwa yeye ni bwana wako.

12 ^kBinti wa Tiro atakuletea zawadi,
watu wenye utajiri watatafuta upendeleo wako.

13 ^lUtukufu wote una binti mfalme katika chumba chake;
vazi lake limefumwa kwa nyuzi za dhahabu.

14 ^mAnaongozwa kwa mfalme, akiwa amevalia mavazi yaliyotariziwa,
mabikira wenzake wanamfuata
na wanaletwa kwako.

15 ⁿWanaingizwa ndani kwa shangwe na furaha,
na kuingia katika jumba la mfalme.

16 ^oWana wenu watachukua nafasi za baba zenu,
mtawafanya wakuu katika nchi yote.

17 ^pNitadumisha kumbukumbu lako katika vizazi vyote,
kwa hiyo mataifa watakusifu milele na milele.